ik tiri yaad ke sahare par
zindagi kaT ga.i kinare par
kaun raste badal raha hai vahan
kaun rahta hai is sitare par
raushni ki agar alamat hai
raakh uḌti hai kyuun sharare par
imtihan ki ḳhabar nahin lekin
ro raha huun abhi ḳhasare par
jab nazar ko nazar nahin aaya
zindagi ruk ga.i nazare par
mere israr par nahin aaya
jis ko israr tha ishare par
ḳhud-numa.i ka jaal tha ‘sahil’
main ne bhi fikr ke sanvare par
Leave a Reply