Haidar Ali Aatish
insaf ki tarazu men taula ayaan hua
yusuf se tere husn ka palla giran hua
ru-e-zamin pe aisa main bismil tapan hua
ud kar mira lahu shafaq-e-asman hua
us barq-vash ka ishq-e-nihani ayaan hua
abr-e-siyah aahon ka mere dhuan hua
piiri men mujh ko ishq-e-hasin-e-javan hua
bar-e-digar kabade men zor-e-kaman hua
ahl-e-zamin se saaf kahan asman hua
kis roz burj-e-mah men farsh-e-katan hua
maadum dagh-e-ishq ka dil se nishan hua
afsos be-charagh hamara makan hua
do tukde ek vaar men khud-e-hubab hai
girdab-e-mauj tegh ko sang-e-fasan hua
dekha jo main ne us ko samundar ki aankh se
gulzar aag ho gai sumbul dhuan hua
milta nahin dimagh hi gesu-e-yar ka
kuchh in dinon men mushk ka saudagaran hua
khush-chashmon ke firaq men khaae ye pech-o-tab
shakh-e-ghazal apna har ik ustukhan hua
sakhti-e-rah-e-ishq se vaqif hue na paanv
josh-e-junun mire liye takht-e-ravan hua
amboh-e-ashiqan se hua husn ko ghurur
kasrat se mushtari ki ye saudagran hua
paivand-e-khak ho gae ik but ki raah men
patthar hamari qabr ka sang-e-nishan hua
phenka gaya na pir-e-falak naal ki tarah
koi na tifl-e-ashk hamara javan hua
tu dekhne gaya lab-e-dariya jo chandni
istada tujh ko dekh ke ab-e-ravan hua
insan ko chahiye ki na ho nagavar-taba
samjhe subuk use jo kisi par giran hua
us gul se arz-e-hal ki hasrat hi rah gai
kante pade zaban men jo mail-e-bayan hua
allah ke karam se buton ko kiya mutia
zer-e-nagin qalam-rav-e-hindostan hua
insaf main ne alam-e-asbab men kiya
banvai chandni jo mayassar katan hua
gardish ne us ki surma kiye apne ustukhan
chakki hamare pisne ko asman hua
qatil ki tegh se rah-e-mulk-e-adam mili
aahan hamare vaste sang-e-nishan hua
fikr-e-buland ne miri aisa kiya buland
‘atish’ zamin-e-sher se past asman hua
Leave a Reply