Nazeer Banarasi
ik raat men sau baar jala aur bujha huun
muflis ka diya huun magar andhi se laḌa huun
jo kahna ho kahiye ki abhi jaag raha huun
so.unga to so ja.unga din bhar ka thaka huun
qindil samajh kar koi sar kaaT na le aa.e
tajir huun ujale ka andhere men khaḌa huun
sab ek nazar phenk ke baḌh jaate hain aage
main vaqt ke show-case men chup-chap khaḌa huun
vo aa.ina huun jo kabhi kamre men saja tha
ab gir ke jo TuuTa huun to raste men paḌa huun
duniya ka koi hadsa ḳhali nahin mujh se
main ḳhaak huun main aag huun paani huun hava huun
mil ja.unga dariya men to ho ja.unga dariya
sirf is liye qatra huun ki dariya se juda huun
har daur ne baḳhshi mujhe me.araj-e-mohabbat
neze pe chaḌha huun kabhi suuli pe chaḌha huun
duniya se nirali hai ‘nazir’ apni kahani
angaron se bach nikla huun phulon se jala huun
Leave a Reply