Ishrat Moin Seemaa
ḳhud-farebi ki kisi had ko nahin manti hai
qamat-e-shauq kisi qad ko nahin manti hai
bu-e-gul ho ki hava ho ki mohabbat ki vaba
itni sarkash hai ki sarhad ko nahin manti hai
vo andheron ka pujari hai use kya malum
raushni raat ki aamad ko nahin manti hai
koi surat dil-e-avara ki ye bechaini
kaḳh-e-yaqut ki masnad ko nahin manti hai
mustarad karte hain kuchh log ḳhuda ko bhi magar
ek duniya hai jo is radd ko nahin manti hai
ghonsla shaḳh se girta hai hava ke hathon
usi chiḌiya ka jo bargad ko nahin manti hai
ye tira nam-o-nasab dil ke na kaam aa.ega
ye mohabbat hai kisi had ko nahin manti hai
ek sailab umanD aaya hai dil men ‘sima’
tishnagi dard ke is had ko nahin manti hai
Leave a Reply