kyon bhala chilman ko sarkane pe vo maa.il nahin
kaun sa dariya hai vo jis ka koi sahil nahin
dar-haqiqat hai yahi me.araj-e-ishq-o-ashiqi
mere us ke darmiyan ab koi bhi haa.il nahin
us ki shamshir-e-nazar ne chaak kar Daala jigar
bevafa hote hue lagta hai vo buzdil nahin
paḌh liya ankhon ke ḳhame se likhi tahrir ko
maslak-e-ushshaq shahid hai ki main jahil nahin
ishq ke chehre pe badnami ka ghaza mal diya
koi chadar koi parda koi bhi mahmil nahin
qabl-az-rusva.i is ahqar se kar lete saval
zahiran to saḳht huun lekin main patthar-dil nahin
ban sake jo aap ke maghrur mathe ka tilak
kya hamare ḳhuun ki surḳhi bhi is qabil nahin
meri ghurbat dekh kar patthar bhi ḳhuun roya kiye
jab ki be-janon ke sinon men koi bhi dil nahin
koi naala koi girya koi aansu koi aah
koi fariyad-e-alam-angez la-hasil nahin
huun tanin-e-ishq ki vaadi men misl-e-gum-shuda
yad-e-yaran se mubarra koi si mahfil nahin
dar-ba-dar qarya-ba-qarya ku-ba-ku divana-var
har jagah DhunDa use lekin koi hasil nahin
ḳhastagi se sar jhuka kar qalb men jab ki nazar
tab laga us zaat se ik lamha ḳhali dil nahin
mustaqil main kar raha huun atishi dariya ubuur
qasd-e-mohkam ho to koi kaam bhi mushkil nahin
ai ‘falak’ main ne jala Daali hain saari kashtiyan
kyunki is manzil se aage koi bhi manzil nahin
Leave a Reply