baDi Hairat Se Arbab-E-Wafa Ko Dekhta Hun Main

Syed Zameer Jafri

baḌi hairat se arbab-e-vafa ko dekhta huun main

ḳhata ko dekhta huun aur saza ko dekhta huun main

abhi kuchh der hai shayad mire mayus hone men

abhi kuchh din fareb-e-rahnuma ko dekhta huun main

ḳhuda malum dil ko justuju hai kin jaziron ki

na jaane kin sitaron ki ziya ko dekhta huun main

ye kya gham hai mire ash.ar ko nam kar diya kis ne

ye dil men kis samundar ki ghaTa ko dekhta huun main

‘zamir’ ik qaid-e-na-mahsus ko mahsus karta huun

kisi nadani-e-zanjir-e-pa ko dekhta huun main