kabhi to aisa bhi ho raah bhuul ja.un main
nikal ke ghar se na phir apne ghar men aa.uun main
bikher de mujhe charon taraf ḳhalaon men
kuchh is tarah se alag kar ki juḌ na pa.un main
ye jo akele men parchha.iyan si banti hain
bikhar hi ja.engi lekin kise dikha.un main
mira makan agar biich men na aa.e to
in unche unche makanon ko phand ja.un main
gavahi deta vahi meri be-gunahi ki
vo mar gaya to use ab kahan se la.un main
ye zindagi to kahin ḳhatm hi nahin hoti
ab aur kitne dinon ye azaab uTha.un main
ghazal kahi hai koi bhang to nahin pi hai
musha.ere men tarannum se kyuun suna.un main
are vo aap ke divan kya hue ‘alvi’
bike na hon to kabaḌi ko saath la.un main
Leave a Reply