Kabhi Idhar Jo Sag-E-Ku-E-Yar Aa Nikla

kabhi idhar jo sag-e-ku-e-yar aa nikla

guman hua mire virane men huma nikla

rukh us ka dekh hua zard nayyar-e-azam

sunahre burj se jis dam vo mah-laqa nikla

vo sun ke paak mohabbat ka naam kahte hain

hamari jaan ko lo ye bhi parsa nikla

hamare paanv pade aa ke aable har gaam

kabhi jo dasht-e-junun men barhana-pa nikla

mah-e-siyam men aaya jo vo hilal-abru

guman hua ye mujhe chand iid ka nikla

jahan ki sair to ki tu ne lekin ai shah-e-husn

kabhi faqir ke takiye pe tu na aa nikla

na nikla vahm ke maare vo ghar se bhi ‘sayyah’

gali se yaar ke tabut jab mira nikla

Leave a Comment