ab tu ho kisi rang men zahir to mujhe kya
thahre tire ghar koi musafir to mujhe kya
virana-e-jan ki jo faza thi so rahegi
chahke kisi gulshan men vo taair to mujhe kya
vo shama mire ghar men to be-nur hi thahri
bazar men vo jins ho nadir to mujhe kya
vo rang-fishan aankh vo tasvir-numa haath
dikhlaen nae roz manazir to mujhe kya
main ne use chaha tha to chaha na gaya main
chahe mujhe ab vo miri khatir to mujhe kya
duniya ne to jaana ki numu us men hai meri
ab ho vo miri zaat ka munkir to mujhe kya
ik khvab tha aur bujh gaya ankhon hi men apni
ab koi pukare mire shair to mujhe kya