zanjir kaT ke kya giri aadhe safar ke biich
main sar pakaḌ ke baiTh gaya rahguzar ke biich
utra lahad men ḳhvahishon ke saath aadmi
jaise musafiron-bhari naav bhanvar ke biich
dushman se kya bacha.engi ye jhaḌiyan mujhe
bachte nahin yahan to payambar shajar ke biich
jitna uḌa main utna ulajhta chala gaya
ik tar-e-kam-numa tha mire bal-o-par ke biich
dete ho dastaken yahan sar phoḌte ho vaan
kuchh farq to rava rakho divar-o-dar ke biich
ghar se chala to ghar ki udasi sisak uThi
main ne use bhi rakh liya raḳht-e-safar ke biich
thakne ke ham nahin the magar ab ke yuun hua
deta raha fareb sitara safar ke biich
mera sabhi ke saath ravayya hai ek sa
‘shahid’ mujhe tamiz nahin ḳhair o shar ke biich
Leave a Reply