teri tasviron ko dekh pighalti hain
ab ye ankhen ham se nahin sambhalti hain
har din chehra alag tarah ka hota hai
gham ki shaklen bhi to roz badalti hain
in ḳhvabon ka sach hona kya mumkin hai
jin ke ḳhatir ankhen meri jalti hain
jaane kis ka lahja us par haavi hai
us ki baten ab angar ugalti hain
dil ke qabristan ka yaron kya kahna
lashen bas jazbat ki is men palti hain
jab tak huun main zinda milne aa jaao
lamha lamha sansen roz nikalti hain
ummidon ka suraj roz nikalta hai
shaam ke jaisi ‘mit’ umiden Dhalti hain
Leave a Reply