Use Ab Ke Wafaon Se Guzar Jaane Ki Jaldi Thi

Rahat Indori

use ab ke vafaon se guzar jaane ki jaldi thi

magar is baar mujh ko apne ghar jaane ki jaldi thi

irada tha ki main kuchh der tufan ka maza leta

magar bechare dariya ko utar jaane ki jaldi thi

main apni muTThiyon men qaid kar leta zaminon ko

magar mere qabile ko bikhar jaane ki jaldi thi

main aḳhir kaun sa mausam tumhare naam kar deta

yahan har ek mausam ko guzar jaane ki jaldi thi

vo shaḳhon se juda hote hue patton pe hanste the

baḌe zinda-nazar the jin ko mar jaane ki jaldi thi

main sabit kis tarah karta ki har a.ina jhuTa hai

ka.i kam-zarf chehron ko utar jaane ki jaldi thi