Akhtar Muslimi
dil hi rah-e-talab men na khona paḌa mujhe
haath apni zindagi se bhi dhona paḌa mujhe
ik din men hans paḌa tha kisi ke ḳhayal men
ta-umr itni baat pe rona paḌa mujhe
ik baar un ko paane ki dil men thi aarzu
sau baar apne aap ko khona paḌa mujhe
barbad ho gaya huun magar mutma.in hai dil
sharminda-e-karam to na hona paḌa mujhe
dekhi ga.i na mujh se jo tufan ki bebasi
kashti ko apni aap Dubona paḌa mujhe
jalve kahan kisi ke bisat-e-nazar kahan
zarre men aftab samona paḌa mujhe
‘aḳhtar’ junun-e-ishq ke maron ko dekh kar
ahl-e-ḳhirad hanse hain to rona paḌa mujhe
Leave a Reply