be-aman huun in dinon main dar-ba-dar phirta huun main
main mavaddat huun vafa huun ḳhair ka jazba huun main
dil ki maujon men bapa kar ke talatum-ḳhezyan
apne andar ki zaminen kaTta rahta huun main
khel hai sarkash havaon ke liye mera vajud
kam-tanabi jis ki qismat hai vo ik ḳhema huun main
hai mukammal vaqt ke suraj pe mera inhisar
zindagi ke paanv se lipTa hua saaya huun main
aisi hi be-chehragi chha.i hui hai shahr men
ap-apna aks huun main aap a.ina huun main
kab milegi mujh ko ‘sarim’ is aziyyat se najat
zehn-o-dil ki kashmakash men raat din uljha huun main
Leave a Reply