ḳhuda ki shaan vo ḳhud ho rahe hain divane
jo rah-e-dasht se aa.e the ham ko palTane
nikal chale to hain targhib-e-dil pe ham ghar se
kahan lagenge Thikane ye ab ḳhuda jaane
na dil raha na rahi dil ki ḳhaak bhi baaqi
huzur aa.e hain ab intizar farmane
jo dil ki aag se vaqif banen vo kya jaane
lipaT ke sham.a se kyuun jal rahe hain parvane
nigah jin ko mili hai vo lutf lete hain
chhalak rahe hain paḌe kaifiyat se virane
nahin hai siine men paivast jis ke tir-e-nigah
vo rah-o-rasm hayat-o-mamat kya jaane
chale to hain ki dikha.enge un ko chiir ke dil
pahunch sakenge ham un tak ye ab ḳhuda jaane
ghaTe to chain nahin hai baḌhe to chain nahin
hamen laga hai ye kya rog koi pahchane
hai sar pe bojh to kya hai magar baḌhe niklo
na uTh sakoge jo baiThe zara bhi sustane
tamam umr hui ek hi ravish pe ‘jigar’
hazar baar hamen azmaya duniya ne
Leave a Reply