Basir Sultan Kazmi
karte rahe kar sakte the ham jitni bhi koshish
divar-e-ta.assub men kahan honi thi jumbish
zindan ki salaḳhon si hain paani ki ye taren
sayyad se kuchh kam nahin har-vaqt ki barish
lazim nahin paidal chalun ya dauḌ laga.un
hain ghar ke mire kaam hi achchhi-bhali varzish
maana ki ilaaj is ke siva kuchh nahin lekin
kya dil ke badalne se badal ja.egi ḳhvahish
kotahiyan apni to dikha.i nahin detin
har baat men aati hai nazar ghair ki sazish
kuchh sang-e-garan-maya hamen bhi mile ‘basir’
sach hai ki akarat nahin jaati koi kavish
Leave a Reply