Irfana Azeez
har chand zaḳhm zaḳhm darida-badan rahe
gul-rang teri yaad ke sab pairahan rahe
dekha tujhe to rang pas-e-rang thi nazar
ye silsile bhi dil ke chaman-dar-chaman rahe
pahron tasavvurat ki mahfil saji rahi
pahron tire ḳhayal se mahv-e-suḳhan rahe
zauq-e-junun pe tang rahin dil ki vus.aten
kis dasht ki talash men shorida-tan rahe
har chand thiin ḳhamosh mire dil ki dhaḌkanen
divar-o-dar ko yaad tire sab suḳhan rahe
Leave a Reply