Khawer Eijaz
jab ek baar kisi intiha pe ja Thahre
phir us ke ba.ad nazar raston men kya Thahre
safar pe nikle the jab zindagi giraft men thi
ma.al-e-kar bas ik mauja-e-hava Thahre
ajab nahin hai ki barson ke ghup andhere men
diya jala.en to manzar hi dusra Thahre
chamak uThe kabhi aa kar miri hatheli par
vahi sitara kabhi asman pe ja Thahre
mufahamat ki nikalti nahin hai raah koi
jab apne apne usulon pe baat aa Thahre
ham ek aise dorahe pe aa chuke hain ki ab
qadam baḌha.e to raste juda juda Thahre
main apne saans ki gaThri utaar luun sar se
hayat-e-tez-safar se kaho zara Thahre
Leave a Reply