nam-e-vafa pe de ke jaan dil ne vafa ḳharid li
thi bhi ḳharidne ki chiiz ḳhuub kiya ḳharid li
hasb-e-mazaq o hasb-e-shauq ek ik ada ḳharid li
us ne jafa.en mol liin main ne vafa ḳharid li
zabt ka dil men kar ke ahd un se baḌhaya mel-jol
dard se pahle dard ki ham ne dava ḳharid li
ahd-e-shabab tha bahar aur saja bahar ko
jitni jahan men mil saki is ne haya ḳharid li
zarf se baḌh ke ne.amat-e-ishq bhi maut ban ga.i
ham ne bhi to ghazab kiya had se siva ḳharid li
ishq ki kar-gah se husn ki bargah se
jis ko na aur kuchh mila is ne qaza ḳharid li
dete dilate be-talab toḌ ke haath rakh diye
tere karam ne taqat-e-dast-e-dua ḳharid li
aaj nasib-e-dushmanan chehra hai kyuun udaas udaas
meri tarah bala-e-ishq tum ne bhi kya ḳharid li
‘manzar’ unhen dikha ke zahr kah raha hai ḳhushi ḳhushi
liije dava le aa.e mol liije shifa ḳharid li
Leave a Reply