poshak na tu pahniyo ai sarv-e-ravan surkh
ho jaae na partav se tire kaun-o-makan surkh
yaan bada-e-ahmar ke chhalakte hain jo saghar
ai pir-e-mughan dekh ki hai saari dukan surkh
pi bada-e-ahmar to ye kahne laga gul-ru
main surkh huun tum surkh zamin surkh zaman surkh
kya paan ki surkhi ne kiya qatl kisi ko
shiddat se hai kyuun aaj tiri tegh-e-zaban surkh
siine men dil-e-gham-zada khuun ho gaya shayad
be-vajh bhi hote hain kahin ashk-e-ravan surkh
kya bhadke hai siine men mire atish-e-furqat
jo aah ke ham-rah nikalta hai dhuan surkh
ye qatl-e-khizan par hain javanan-e-chaman shaad
har samt gul-o-lala udate hain nishan surkh
gar meri shahadat ki basharat nahin ‘parvin’
phir kyuun hai khat-e-shauq ke unvan ye nishan surkh
Leave a Reply