tire dayar talak yuun to aa hi jaate hain
ye aur baat tasavvur men ji jalate hain
miri udaas nazar ka ḳhayal hai varna
use to chand sitare bahut bulate hain
tamam umr bhaTakte rahe jo sahra men
unhen ye vahm ki vo rasta dikhate hain
sitam ki bhiik sahi doston ka tohfa hai
baḌi ḳhushi se ye ehsan ham uThate hain
hamari nazron ki pakizgi salamat hai
isi kamal pe duniya ko ham jhukate hain
ye karbala hai to ab lauT kar kahan jaa.en
tamam raste apne yahin pe aate hain
use jo mansab-o-jah-o-jalal pyara hai
to ham bhi kasa-e-tohmat kahan uThate hain
Leave a Reply