nahin asman tiri chaal men nahin aunga
main palat ke ab kisi haal men nahin aunga
miri ibtida miri intiha kahin aur hai
main shumara-e-mah-o-sal men nahin aunga
abhi ik azaab se hai safar ik azaab tak
abhi rang-e-sham-e-zaval men nahin aunga
vahi halaten vahi suraten hain nigah men
kisi aur surat-e-hal men nahin aunga
mujhe qaid karne ki zahmaten na uthaiye
nahin aunga kisi jaal men nahin aunga
main khayal-o-khvab hisar se bhi nikal chuka
so kisi ke khvab-o-khayal men nahin aunga
na ho bad-guman miri dad-khvahi-e-hijr se
miri jaan main shauq-e-visal men nahin aunga
Leave a Reply