Rauf Khair
a.ankhon pa abhi tohmat-e-bina.i kahan hai
tu ḳhud hi tamasha hai tamasha.i kahan hai
a.ina hui tishnagi payabi-e-jan se
chehre pa to likkhi hui rusva.i kahan hai
in jagti a.ankhon ko mile dhuup ke bazar
ai dil vo pighalti hui tanha.i kahan hai
suraj hai ki bas nok pe suui ki khaḌa hai
ab fursat-e-kam-kam bhi mire bhaa.i kahan hai
ḳhuun chuste lamhon se kaho haath pasaren
ehsas ki surat abhi zarda.i kahan hai
kuchh aur bikhar kar kahin pahchan na kho luun
is shahr ko miTi miri raas aa.i kahan hai
vo shaḳhs baḌe chaav se kuchh puchh raha hai
tu aise men ai lazzat-e-goya.i kahan hai
ḳhair apnon men ik ham hi nakul aa.e hain sha.er
shahzadgi-e-shauq ye aba.i kahan hai
Leave a Reply