Shariq Kaifi
kahan socha tha main ne bazm-ara.i se pahle
ye meri aḳhiri mahfil hai tanha.i se pahle
bas ik sailab tha lafzon ka jo rukta nahin tha
ye halchal sat.h pe rahti hai gahra.i se pahle
bahut din hosh-mandon ke kahe ka maan rakkha
magar ab mashvara karta huun sauda.i se pahle
faqat rangon ke is jhurmuT ko main sach maan luun kya
vo sab kuchh jhuuT tha dekha jo bina.i se pahle
kisi bhi jhuuT ko jiina bahut mushkil nahin hai
faqat dil ko hara karna hai sachcha.i se pahle
ye ankhen bhiiḌ men ab tak usi ko DhunDti hain
jo saaya tha yahan pahle tamasha.i se pahle
Leave a Reply