bahadur-shah-zafar

Bhari Hai Dil Mein Jo Hasrat Kahun To Kis Se Kahun

bhari hai dil men jo hasrat kahun to kis se kahun

sune hai kaun musibat kahun to kis se kahun

jo tu ho saaf to kuchh main bhi saaf tujh se kahun

tire hai dil men kudurat kahun to kis se kahun

na kohkan hai na majnun ki the mire hamdard

main apna dard-e-mohabbat kahun to kis se kahun

dil us ko aap diya aap hi pashiman huun

ki sach hai apni nadamat kahun to kis se kahun

kahun main jis se use hove sunte hi vahshat

phir apna qissa-e-vahshat kahun to kis se kahun

raha hai tu hi to gham-khvar ai dil-e-gham-ghin

tire siva gham-e-furqat kahun to kis se kahun

jo dost ho to kahun tujh se dosti ki baat

tujhe to mujh se adavat kahun to kis se kahun

na mujh ko kahne ki taqat kahun to kya ahval

na us ko sunne ki fursat kahun to kis se kahun

kisi ko dekhta itna nahin haqiqat men

‘zafar’ main apni haqiqat kahun to kis se kahun

More Poems

Leave a Comment