Basheer Ahmad Basheer
qarya qarya ḳhaak uḌaa.i kucha-gard faqir hue
purab pachchhim DhunDa us ko aḳhir gosha-gir hue
kaun hain ye kya rabt tha un se kya kahiye kuchh yaad nahin
ye chehre kab dil men utre kis lamhe tasvir hue
sau paira.e DhunDe phir bhi aaj ke din tak aajiz hain
haa.e vo baat jo kah bhi na paa.e aur daftar tahrir hue
sad.ha gahri soch men Duubi sadiyan ham par sarf huiin
ik do baras ki baat nahin ham qarnon men ta.amir hue
vo shab vo shab-ḳhun adu ka kis uslub bayan karen
ghayal kaise pahron taḌpe ham kis taur asiir hue
kya main kya tu aaj bhi donon ḳhaak hain kal bhi ḳhaak ‘bashir’
jiina un ka marna un ka jo vaj.h-e-ḳhair-e-kasir hue
Leave a Reply