Baqi Siddiqui
un ka ya apna tamasha dekho
jo dikhata hai zamana dekho
vaqt ke paas hain kuchh tasviren
koi Duuba hai ki ubhra dekho
rang sahil ka nikhar aa.ega
do ghaḌi janib-e-dariya dekho
tilmila uTTha ghana sannaTa
phir koi niind se chaunka dekho
ham-safar ghair hue jaate hain
fasla rah gaya kitna dekho
barf ho jaata hai sadiyon ka lahu
ek Thahra hua lamha dekho
rang uḌte hain tabassum ki tarah
a.ina-ḳhanon ka daava dekho
dil ki bigḌi hui surat hai yahan
ab koi aur ḳharaba dekho
ya kisi parde men gum ho jaao
ya uTha kar koi parda dekho
dosti ḳhun-e-jigar chahti hai
kaam mushkil hai to rasta dekho
saada kaghaz ki tarah dil chup hai
hasil-e-rang-e-tamanna dekho
yahi taskin ki surat hai to phir
chaar din gham ko bhi apna dekho
gham-gusaron ka sahara kab tak
ḳhud pe bhi kar ke bharosa dekho
apni niyat pe na jaao ‘baqi’
ruḳh zamane ki hava ka dekho
Leave a Reply