Arsh Malsiyani
mujh se itna na inhiraf karo
jo ḳhata ho ga.i muaaf karo
main ḳhataon ko maan leta huun
tum mohabbat ka e’tiraf karo
ye kudurat nahin tumhen zeba
dil ko meri taraf se saaf karo
faisla tum pe ab to chhoḌ diya
mere haq men karo ḳhilaf karo
meri har baat men hai majburi
meri har baat ko muaaf karo
saaf hai mere dil ka a.ina
mujh se tum baat saaf saaf karo
ku-e-janan maqam-e-faiz hai ‘arsh’
tum isi ka.abe ka tavaf karo
Leave a Reply