Aslam Mahmood
ai mire ghubar-e-sar tu hi to nahin tanha ra.egan to main bhi huun
mere har ḳhasare par mere ye muḳhalif kya shadman to main bhi huun
dasht ye agar apni vus.aton pe nazan hai mujh ko is se kya lena
zarra hi sahi lekin meri apni vus.at hai be-karan to main bhi huun
dar-ba-dar bhaTakti hai dasht o shahr o sahra men apna sar paTakti hai
ai hava-e-avara teri hi tarah be-ghar be-aman to main bhi huun
kuuch kar ga.e jaane kitne qafile jin ka kuchh nishan nahin milta
main bhi huun kamar-basta ya.ani rah-rav-e-rah-e-raftagan to main bhi huun
tu jo ek sho.ala hai chob-e-ḳhushk huun main bhi apna haal yaksan hai
der hai bhaḌakne ki phir to raakh hai tu bhi phir dhuan to main bhi huun
Leave a Reply