Saba Akbarabadi
ashk-bari nahin furqat men sharar-bari hai
aankh men ḳhuun ka qatra hai ki chingari hai
har nafas ziist guzar jaane ka gham taari hai
maut ka ḳhauf bhi ik ruuh ki bimari hai
bavajude-ki mohabbat koi zanjir nahin
phir bhi dil ko mire ehsas-e-giraftari hai
kuchh is andaz se us ne gham-e-furqat baḳhsha
jaise ye bhi koi in.am-e-vafadari hai
gham-e-ḳhamosh ko be-vaj.h tasalli dena
dil-navazi ki ye surat bhi dil-azari hai
roz halat badalte hain ba-shart-e-taufiq
ziist majmua-e-asani o dushvari hai
jagna ishq men har ek ki taqdir nahin
niind qurban ho jis par ye vo bedari hai
ki mire haath se yuun nazr-e-bahar us ne qubul
jaise ye phuul nahin hai koi chingari hai
ik taghaful se hua ishq ka dil ko ehsas
us ki ghaflat ka natija miri hushyari hai
yuun bhi ara.ish-e-paiham men ulajhta hai koi
ye ḳhud-ara.i hai dekho ki ḳhud-azari hai
matam-e-ishq se fursat nahin milti hai ‘saba’
roz-o-shab apni umidon ko aza-dari hai
Leave a Reply