Niyaz Sultanpuri
vo naqd-e-jan aur vo bazar kya hue
ai shahr-e-mir tere ḳharidar kya hue
yaran-e-kaj-kulahi ki sohbat kahan ga.i
bala-e-bam abru-e-ḳhamdar kya hue
vo naghma-ḳhvan-e-bad-e-bahari kidhar ga.e
ashuftagan-e-nargis-e-bimar kya hue
vo hunar-e-inqalab ka mausam kahan gaya
vo asman pe abr-e-guhar-bar kya hue
vo ilm-o-agahi ke muhafiz kidhar ga.e
zulmat-kade men nuur ke minar kya hue
asan tha jin ke dam se kaḌi dhuup ka safar
vo shah-rah-e-zist ke ashjar kya hue
jo the hamare shahr ki pahchan ai ‘niyaz’
vo sahiban-e-jubba-o-dastar kya hue
Leave a Reply