ahmad-shanas

Mohabbaton Ko Kahin Aur Pal Kar Dekho

mohabbaton ko kahin aur paal kar dekho

mata-e-jan ko badan se nikal kar dekho

badal ke dekho kabhi nisbaton ki duniya ko

badan ko ruuh ke khane men Daal kar dekho

suno use to samaat se mavara ho kar

jo dekhna ho to ankhen nikal kar dekho

yaqin dasht se phutega ab-e-ju ki tarah

ki harf-e-”la” ki gavahi bahal kar dekho

nafas nafas hai yahan maqbara aqidat ka

ye maqbaron ka jahan paemal kar dekho

isi hava men mohabbat ka diip jalta hai

isi jahan ko jahan-e-visal kar dekho

vo sang de to hararat nichod lo apni

jo phuul de to nigah-e-kamal kar dekho

phir us ke baad koi Dar nahin talatum ka

us ek buund ke gham ko vishal kar dekho

badan ki pyaas bhi ik mavara kahani hai

har ek buund ko dariya khayal kar dekho

palat ke aenge savan ke rang aankhon men

tum apne-ap se rishta bahal kar dekho

vo bolta hai pahadon ki ot se aksar

kisi pahad se us ka saval kar dekho

ye raaz aur kahan tak hamen nibhana hai

kabhi to raat men suraj nikal kar dekho

tum apne gauhar-e-yakta ko is tarah DhunDo

ki khud ko be-sar-o-saman khayal kar dekho

jo dekhna ho kabhi doston ka dil ‘ahmad’

khare usuul ka patta uchhal kar dekho

More Poems

Leave a Comment