munsif-e-vaqt se begana guzarna hoga
faisla apna hamen aap hi karna hoga
zaḳhm-e-ehsas kabhi chain na lene dega
sar-e-maidan-e-tamanna hamen marna hoga
tujhe chhu kar bhi tujhe pa na sakenge to hamen
surat-e-dard tire dil men utarna hoga
jaane le aa.i kahan tezi-e-raftar hamen
ki Thahar jaa.en to sadiyon ka Thaharna hoga
asr-e-hazir men hai jiina hi jihad-e-akbar
jis ki ḳhatir hamen har shai se guzarna hoga
hashr se kam na kisi din ke jhamele honge
ik qayamat hamen har shab ka guzarna hoga
ro.en kya Dubte suraj ke liye ham ‘ruhi’
ki na.i shaan se kal us ko ubharna hoga
Leave a Reply