Poet
ghup ḳhamoshi jaise qabristan men huun
kya main zinda lashon ke asthan men huun
raat Dhale virani milne aati hai
janti hai main us ke aqd amaan men huun
sard hava.en yaad us ki biphra mausam
vahshat-e-zist bata main kis ke dhyan men huun
phir sarsabz hue jaate hain saare peḌ
lagta hai ik main hi namak ki kaan men huun
jante ho is vaqt miri halat hai kiya
kaala phuul udasi ke gul-dan men huun
vapas jaane vaale ghar ko jaate hain
main azad parinda kis zindan men huun
lu se ziyada tez nigahon ki andhi
main jivan ke aise registan men huun
Leave a Reply