‘shu.ur’ vaqt pe dil ki dava hui hoti
to aaj fikr na hoti shifa hui hoti
muravvatan bhi agar aap aa ga.e hote
tamaniyyat hamen be-intiha hui hoti
na jaane kitne baras ho ga.e fughan karte
kabhi to dad-rasi ai ḳhuda hui hoti
na tha nasib men dil ki murad bar aana
to kaash sabr ki aadat ata hui hoti
hamara haal tumhari samajh men aa jaata
agar kisi se mohabbat zara hui hoti
ham apne-ap se rahte na be-ḳhabar to bhala
hamari surat-e-halat kya hui hoti
‘shu.ur’ aap ki aamad se laakh behtar tha
gharib-ḳhane pe nazil bala hui hoti
Leave a Reply