bebasi aisi bhi hoti hai bhala
zindagi aisi bhi hoti hai bhala
raushni ab mere ashkon se hai bas
tirgi aisi bhi hoti hai bhala
hanste hanste ho gaya barbad main
khush-dili aisi bhi hoti hai bhala
chikhta rahta huun aksar be-sabab
bekasi aisi bhi hoti hai bhala
ji raha huun main use dekhe baghair
be-hisi aisi bhi hoti hai bhala
puchhte ho aib auron se mire
dosti aisi bhi hoti hai bhala
zindagi aisi hi hoti hai bhai
zindagi aisi bhi hoti hai bhala
rang hi chehre pe lahrate hain ab
jan-kani aisi bhi hoti hai bhala
hain lahu ki bunden ab meri sipah
sar-kashi aisi bhi hoti hai bhala
ek hi surat yahan charon taraf
raushni aisi bhi hoti hai bhala
gaal jhulse ja rahe hain kyuun mire
chandni aisi bhi hoti hai bhala
Leave a Reply