Iftikhar Naseem
is tarah soi hain ankhen jagte sapnon ke saath
ḳhvahishen lipTi hon jaise band darvazon ke saath
rat-bhar hota raha hai us ke aane ka guman
aise Takrati rahi ThanDi hava pardon ke saath
ek lamhe ka ta.alluq umr bhar ka rog hai
dauḌte phirte rahoge bhagte lamhon ke saath
main use avaz de kar bhi bula sakta na tha
is tarah TuuTe zaban ke rabte lafzon ke saath
ek sannaTa hai phir bhi har taraf ik shor hai
kitne chehre aankh men phaile hain avazon ke saath
jani-pahchani hain baten jane-bujhe naqsh hain
phir bhi milta hai vo sab se muḳhtalif chehron ke saath
dil dhaḌakta hi nahin hai us ko pa kar bhi ‘nasim’
kis qadar manus hai ye nit-na.e sadmon ke saath
Leave a Reply