kin manzilon men gardish-e-lail-o-nahar hai
un ka karam bhi meri tabi.at pe baar hai
meri zaban pe harf-e-shikayat ka mudda.a
un ki zaban pe va.ada-e-be-e’tibar hai
dekhe ulaT ke koi jo tariḳh ke varaq
har naghma mera zamin-e-fasl-e-bahar hai
ik kashmakash si ho ga.i maut-o-hayat men
ankhon ko meri jab se tira intizar hai
ḳhud apne aap jaan le apne maqam ko
nau-e-bashar zara bhi agar burdbar hai
phaili hui hai jab se chaman men ḳhizan ki baat
simTa hua sa jalva-e-husn-e-bahar hai
khata hai kitna gham koi piita hai kitni mai
‘raje’ ye apne zarf pe dar-o-madar hai
Leave a Reply