Bedam Shah Warsi

Kabe Ka Shauq Hai Na Sanam-Khana Chahiye

kaabe ka shauq hai na sanam-khana chahiye

janana chahiye dar-e-janana chahiye

saghar ki aarzu hai na paimana chahiye

bas ik nigah-e-murshid-e-mai-khana chahiye

hazir hain mere jaib-o-gareban ki dhajjiyan

ab aur kya tujhe dil-e-divana chahiye

ashiq na ho to husn ka ghar be-charagh hai

laila ko qais shama ko parvana chahiye

parvarda-e-karam se to zeba nahin hijab

mujh khana-zad-e-husn se parda na chahiye

shikva hai kufr ahl-e-mohabbat ke vaste

har ik jafa-e-dost pe shukrana chahiye

bada-kashon ko dete hain saghar ye puchh kar

kis ko zakat-e-nargis-e-mastana chahiye

‘bedam’ namaz-e-ishq yahi hai khuda-gavah

har-dam tasavvur-e-rukh-e-janana chahiye

More Poems

Leave a Comment