Poet
us ne phir aur kya kaha hoga
raz-e-hasti bata chuka hoga
tum jo chaho to ja milo us se
vo abhi moḌ par khaḌa hoga
be-ḳhudi aur baḌh ga.i dil ki
jaane kya yaad aa gaya hoga
mil ga.iin jis se aap ki nazren
aaj tak ḳhvab dekhta hoga
koi apni hansi ke parde men
dard dil ka chhupa raha hoga
ajnabi shahr men chalo DhunDen
koi to dard-ashna hoga
sham-e-gham men ye raushni kaisi
dil ka sho.ala bhaḌak uTha hoga
Leave a Reply