Mohabbat Soz Bhi Hai Saz Bhi Hai

mohabbat soz bhī hai saaz bhī hai

ḳhamoshī bhī hai ye āvāz bhī hai

nasheman ke liye betāb taa.ir

vahāñ pābandī-e-parvāz bhī hai

ḳhamoshī par bharosā karne vaale

ḳhamoshī dard kī ġhammāz bhī hai

hai me.arāj-e-ḳhirad bhī arsh-e-a.azam

junūñ kā farsh pā-andāz bhī hai

dil-e-begāna ḳhud duniyā meñ terā

koī hamdam koī hamrāz bhī hai

kabhī muhtāj lai kā bhī nahīñ ye

kabhī naġhma rahīn-e-sāz bhī hai

kabhī to dil hai mahv-e-be-niyāzī

kabhī tauf-e-harīm-e-nāz bhī hai

tarāna-hā-e-sāz-e-zindagī meñ

ik āvāz-e-shikast-e-sāz bhī hai

Leave a Comment