Arsh Malsiyani
mohabbat soz bhi hai saaz bhi hai
ḳhamoshi bhi hai ye avaz bhi hai
nasheman ke liye betab taa.ir
vahan pabandi-e-parvaz bhi hai
ḳhamoshi par bharosa karne vaale
ḳhamoshi dard ki ghammaz bhi hai
hai me.araj-e-ḳhirad bhi arsh-e-a.azam
junun ka farsh pa-andaz bhi hai
dil-e-begana ḳhud duniya men tera
koi hamdam koi hamraz bhi hai
kabhi muhtaj lai ka bhi nahin ye
kabhi naghma rahin-e-saz bhi hai
kabhi to dil hai mahv-e-be-niyazi
kabhi tauf-e-harim-e-naz bhi hai
tarana-ha-e-saz-e-zindagi men
ik avaz-e-shikast-e-saz bhi hai
Leave a Reply