dil men charagh-e-ishq na jo zau-fishan rahe
rana.i-e-ḳhayal na husn-e-bayan rahe
shamil hai us men meri tamanna ka ḳhuun bhi
rangin tiri ada ki na kyon dastan rahe
dil miT gaya kashakash-e-ummid-o-bim men
ab mehrban ho koi ki na-mehrban rahe
us rashk ka bura ho jo dekha unhen kabhi
pahron ham apne aap se bhi bad-guman rahe
mahrumi-e-davam ne baḳhsha hamen sukun
kunj-e-qafas men pahunche to ham shadman rahe
puchho ye apne jalva-e-mahjub se zara
ham kyon fareb-ḳhurda-e-vahm-o-guman rahe
bazm-e-musha.era men suna.en kise ghazal
ab qadr-dan zamane men ‘sa.ib’ kahan rahe
Leave a Reply