Wo Para Hun Main Jo Aag Mein Hun Wo Barq Hun Jo Sahab Mein Hun

vo paara huun main jo aag men huun vo barq huun jo sahab men huun

zamin pe bhi iztirab men huun falak pe bhi iztirab men huun

na main hava men na khaak men huun na aag men huun na aab men huun

shumar mera nahin kisi men agarche main bhi hisab men huun

agarche paani ki mauj ban kar hamesha main pech-o-tab men huun

vahi huun qatra vahi huun dariya jo ain chashm-e-habab men huun

sulaya kis ne gale laga kar ki suur bhi thak gaya jaga kar

bapa hai aalam men shor-e-mahshar mujhe jo dekho to khvab men huun

maza hai saaqi tire karam se zuhur mera hai tere dam se

vo baada huun jo huun mai-kade men vo nashsha huun jo sharab men huun

ilahi vo gore gore talve kahin na ho jaaen mujh se maile

ki khaak ban kar ba-rang-e-surma hamesha chashm-e-rikab men huun

jo bhes apna badal ke aaya to rang-e-itlaq munh se dhoya

kiya hai paani men qaid mujh ko hava ki surat habab men huun

ghazab hai josh-e-zuhur tera pukarta hai ye nuur tera

khuda ne andha kiya hai jis ko usi ke aage hijab men huun

hui hai donon ki ek halat na chain us ko na chain mujh ko

udhar vo hai mahv shokhiyon men idhar jo main iztirab men huun

ilahi mujh par karam ho tera na khol aamal-nama mera

pukarta hai ye khatt-e-qismat ki main bhi fard-e-hisab men huun

dimagh men huun qadah-kashon ke dahan men aaya huun mah-vashon ke

nasha vo huun jo sharab men huun maza vo huun jo kabab men huun

vo apna chehra agar dikhae yaqin andhon ko khaak aae

pukarti hai ye be-hijabi ki main azal se hijab men huun

alahada kar ke khud se mujh ko jo tu ne bakhsha to khaak bakhsha

agarche jannat mujhe mili hai ilahi phir bhi azaab men huun

hujum nazron ka hai vo munh par diya hai dono ko jis ne dhoka

yaqin ye mujh ko pada hai parda guman ye un ko naqab men huun

jo mujh ko us se juda karoge to mera nuqsan kya karoge

nahin huun manind-e-sifr kuchh bhi agarche main bhi hisab men huun

na aaya mar kar bhi chain mujh ko utha miri khaak se bagula

buton ka gesu to main nahin huun ilahi kyuun pech-o-tab men huun

jo haal puchho to ik kahani nishan puchho to be-nishani

vo zarra huun jo mita hua huun agarche main aftab men huun

mita agarche mazar mera chhuta na vo shahsavar mera

pukarta hai ghubar mera ki main bhi hazir rikab men huun

karam ki ‘mail’ pe bhi nazar ho nazar men phir chulbula asar ho

azal se ummid-var main bhi ilahi teri janab men huun

Leave a Comment