Dil-E-Muztar Ki Dawa Kijiyega

dil-e-muztar kī davā kījiyegā

na ho mumkin to duā kījiyegā

bām-e-ulfat se to gul hī barseñ

talḳhī-e-jāñ na sivā kījiyegā

bār-e-jāñ ko to zarā kam kiije

qarz ehsāñ kā adā kījiyegā

jāñ-ba-lab haiñ jo ḳhizāñ meñ ashjār

zard pattoñ kī havā kījiyegā

shab-e-furqat ke taqāze jo hoñ

dil ko dil se na judā kījiyegā

be-nishāñ aap ke dīvāne haiñ

jī se guzreñ to patā kījiyegā

apnoñ meñ raat guzāreñ ‘rāhī’

kal safar nām-e-ḳhudā kījiyegā

Leave a Comment