Mehman

Asrarul Haq Majaz

aaj ki raat aur baaqi hai

kal to jaana hi hai safar pe mujhe

zindagi muntazir hai munh phade

zindagi khaak o khuun men luthdi

aankh men shoala-ha-e-tund liye

do ghadi khud ko shadman kar len

aaj ki raat aur baaqi hai

chalne hi ko hai ik sumum abhi

raqs-farma hai ruh-e-barbadi

barbariyat ke karvanon se

zalzale men hai sina-e-giti

zauq-e-pinhan ko kamran kar len

aaj ki raat aur baaqi hai

ek paimana-e-mai-e-sarjosh

lutf-e-guftar garmi-e-aghosh

bose is darja atishin bose

phunk dalen jo meri kisht-e-hosh

ruuh yakh-basta hai tapan kar len

aaj ki raat aur baaqi hai

ek do aur saghar-e-sarshar

phir to hona hi hai mujhe hoshiyar

chhedna hi hai saz-e-zist mujhe

aag barsaenge lab-e-guftar

kuchh tabiat to ham ravan kar len

aaj ki raat aur baaqi hai

phir kahan ye hasin suhani raat

ye faraghat ye kaif ke lamhat

kuchh to asudgi-e-zauq-e-nihan

kuchh to taskin-e-shorish-e-jazbat

aaj ki raat javedan kar len

aaj ki raat aur aaj ki raat