khvab ki basti men afsane ka ghar
shama ki lau par hai parvane ka ghar
ban gae akhir harif-e-bal-o-par
daam ki divar aur daane ka ghar
aap bhi sang-e-taaqqul phenkiye
aina-khana hai divane ka ghar
main junun-e-ishq aur sahra-e-gham
tu adu ki bazm begane ka ghar
aql-o-danish ilm-o-irfan fikr-o-hosh
kin hisaron men hai farzane ka ghar
ho gae gumrah kuchh meri tarah
dhundte hain shaikh paimane ka ghar
qismat-e-‘tarzi’ yahi jagir thi
shahr-e-gham kahiye ki virane ka ghar
Leave a Reply