Koi Le Kar Khabar Nahin Aata

koi le kar khabar nahin aata

jo gaya nama-bar nahin aata

chand kis ja nazar nahin aata

yaar kyuun mere ghar nahin aata

dam mohabbat ka bhar nahin aata

raaz ifsha to kar nahin aata

ishq kya jaane zahid-e-be-maghz

Dhang ye umr-bhar nahin aata

panDito pattre men dekho to

kyuun mira nama-bar nahin aata

laala har saal rang laata hai

rang-e-dagh-e-jigar nahin aata

vo to kahte hain sabr kar chande

aur yahan sabr kar nahin aata

kabhi puchho lipat ke siine se

ab to munh ko jigar nahin aata

shisha-e-dil men o pari-paikar

hai pari to utar nahin aata

ham bhi baten banaya karte hain

sher kahna magar nahin aata

ghuncha gul ho ke un se kahta hai

kis ka munh ko jigar nahin aata

rang laaya nahin abhi rona

abhi lakht-e-jigar nahin aata

naseha kyuun na ho khayal un ka

khvab to rat-bhar nahin aata

umr-bhar ik tumhin ko pyaar kiya

dil kahin is qadar nahin aata

mere marne ki kya nahin hai khabar

kyuun tu ai be-khabar nahin aata

kyuun bigadiye bane bane na bane

khair bande ko shar nahin aata

zabh mujh ko anile-pan ne kiya

qatl qatil ko kar nahin aata

kucha-e-yar hai ki jannat hai

jo gaya phir ke ghar nahin aata

yaar kothe pe apne chadhta hai

mah falak se utar nahin aata

ji na chahe jise main kya chahun

mujh ko be-maut mar nahin aata

dekh kar un ko jis ko dekhe ‘mehr’

koi itna nazar nahin aata

Leave a Comment