Zaheer Kashmiri
farz barson ki ibadat ka ada ho jaise
but ko yuun puuj rahe hain ki ḳhuda ho jaise
ek pur-pech ghina ek hariri naghma
haa.e vo husn ki jangal ki sada ho jaise
ishq yuun vadi-e-hijran men hua mahv-e-ḳhiram
ḳharzaron men koi abla-pa ho jaise
arizon par vo tire tabish-e-paiman-e-vafa
chandni raat ke chehre pe haya ho jaise
is tarah daagh damakte hain dil-e-vahshi par
qais ke jism pe phulon ki aba ho jaise
kitna dilkash hai tiri yaad ka paala hua ashk
sina-e-ḳhak pe mahtab gira ho jaise
ratjage vo bhi nashat-e-gham-e-mahbub ke saath
husn valon ne baḌa kaam kiya ho jaise
hijr ki raat ajab rang hai paimane ka
dast mai-ḳhvar men bujhta sa diya ho jaise
ḳhak-e-dil par tire sayyal tasavvur ka ḳhiram
reg-e-sahra pe ravan bad-e-saba ho jaise
aaj us shoḳh ki chitvan ka ye aalam hai ‘zahir’
husn apni hi adaon se ḳhafa ho jaise
Leave a Reply