kam-zarf bhi hai pi ke bahakta bhi bahut hai
bharta bhi nahin aur chhalakta bhi bahut hai
allah ki marzi ka to saḳhti se hai paband
hakim ki raza ho to lachakta bhi bahut hai
kotah-qadi kahti hai khaTTe hain ye angur
lekin gah-o-be-gah lapakta bhi bahut hai
parva hai na kuchh taal ki ne sur ki ḳhabar hai
par saaz pe duniya ke maTakta bhi bahut hai
shoridgi baḌhti hai dar-e-laili-e-zar par
divar pe ye sar ko paTakta bhi bahut hai
mahfil men to suniye havas-e-jah pe taqrir
pahlu men yahi ḳhaar khaTakta bhi bahut hai
‘baqar’ jo bhaTakta hai ma.ani ke safar men
ho surat-e-zeba to aTakta bhi bahut hai
Leave a Reply