Rafique Khayal
shaam thi ham the aur samundar tha
kis qadar dil-fareb manzar tha
ik taraf thi ḳhushi ujalon ki
ik taraf shaam hone ka Dar tha
the pareshan tiir nazron ke
jab talak dil mira hadaf par tha
vo tha kamsin ye sach sahi lekin
hasraton men mire barabar tha
dil to tha mutma.in rifaqat men
ḳhauf sa dhaḌkanon ke andar tha
apne hathon use ganvaya hai
jis men pinhan mira muqaddar tha
us ki rangin qurbaton ke sabab
raat jannat-numa mira ghar tha
shahr-e-jan ki udaas galiyon men
mushta.il ḳhvahishon ka lashkar tha
shor kamre men tha qayamat ka
chup ka aalam ‘ḳhayal’ bahar tha
Leave a Reply